Tadhg Ó Neachtain agus Muiris Ó Conaill ag trácht ar bhlianta an áir, 1739-42

Bhí tréimhse na drochaimsire a bhuail an Eoraip i dtreo dheireadh na bliana 1739 agus a lean isteach go dtí an bhliain 1742 ar cheann desna tréimhsí ba mheasa a bhfuil eolas uirthi. I Sasana láir, mar a bhfuil sonraí leanúnacha teochta ar fáil go míosúil ó 1659 ar aghaidh, bhí 1740 ar an mbliain ab fhuaire ó 1659 i leith, le méanteocht 6.8 chéim ceinteagráid.1 Ní móide go raibh an teocht in Éirinn ró-éagsúil ag an am. Léiríonn an graf thíos gnáththeocht mhíosúil na linne i Sasana láir, an teocht idir Eanair 1740 agus Nollaig 1741, agus an bhearna eatarthu. Taispéanann sé go raibh an teocht fé bhun an mheáin ar feadh leathbhliana idir thús 1740 agus lár 1741. Dob í mí Eanair 1740, nuair a bhí an mheánteocht seacht gcéim fé bhun an mheáin, an mhí ba mheasa ar fad, ach bhí Feabhra na bliana 1740 eisceachtúil chomh maith.