Cion an éigis

Tosnód ar dtúis leis an méid seo mar gheall ar Mháirtín Ó Direáin (1910-1988) a d’áitimh Frank O’Brien ina shaothar Filíocht Ghaeilge na Linne Seo: Is féidir file de réir seanchais a ghairm do Ó Direáin sa mhéid go bhfuil filíocht scríofa aige (seachas mar atá scríofa ag na filí eile) a dhéanann trácht ar na dualgais atá ar Ghaeil dá chéile amhail mar a rinne go leor de na filí Gaeilge a chuaigh roimhe (de ghnáth níl an téama seo ceangailte aige le heachtraí stairiúla faoi leith). Má tá go maith ós cionn dhá scór bliain ó shin ann ó scríobhadh an méid sin, agus má ghabhann fós cuid éigin den nginearáltacht leis mar ráiteas, is í an chuid de a nascann an Direánach le ‘go leor de na filí Gaeilge a chuaigh roimhe’ is suim liomsa anseo. Anois, ní hamhlaidh atáim á rá gur mhian leis aithris a dhéanamh orthu siúd a chuaigh roimis — fada uaidh!